لتَكُن لي سُلطانًا وأنا تاجُك بقلم هدير هاشم

_ده متجوز!
_ كان متجوز.
_ وهي فرقت يا ماما
_ اه فرقت مراته دلوقت مش معاه.
_ ماما هو انتو عايزين تخلصوا مني! مش هتجوز واحد كان متجوز.
_ ابوكي قال للناس يجوا مش هينفع يرجع في كلامه.
_ هتجوزوي ڠصب عني!
_ ربنا ما يجيب ڠصب اتعاملي كأنه واحد جاي يتقدملك ومش متجوز وشوفي بعدها ايه هيحصل!
بصيتلها وسكت أنا تاج البنات رمز القوة والحنية الشخصية اللي محدش يقدر يمشي كلامه عليها ولا بتسمح لده يحصل تتجوز واحد متجوز! تتجوز أصلا ويكون قرارها عليه رئيس يقبل ويرفض!
_ سنة الحياة يا تاج.
_ متجننيش يا وعد أنت عارفه اني مش هوافق.
_ ماشي بس اهلك مش عارفين.
_ براحتهم بس ميزعلوش من اللي هيحصل.
_ هتعملي ايه يبت هاشم!
_ ولا حاجه هعمل ايه يعني مش عايزيني أقابله عيني هقابله.
_ تاج الراجل مالوش ذنب تهينيه ومتصغريش أهلك قدام الناس خليكي عاقلة الله يهديكي.
وأنا من امتى كنت مچنونة! عادي هقابله جاي بعد كام ساعة الننوس ويا ترى ساب مراته ليه! ولا هي اللي سابته! تاج البنات هتاخد واحد متجوز قبل كده اكيد كبير! يادي الليلة انا ايه خلاني اقول موافقة م كنت قولت ميجيش وخلاص.
بصيت لنفسي بقوة وانا بتشجع إني البس لبست فستان ساده بيبي بلو عملت حجابي وداريت شعري كويس رسمت عيوني بالايلاينر وحطيت روج هادي بصيت لنفسي بفخر.
_ جاي لتاج البنات وناسي إنها هتنسيه إسمه.
_ جاهزة.
_ أيوة يا بابا.
_ تاج انتي عارفه اني مش هأذيكي.
_ والله كنت عارفه قبل يومين كده.
_ لما تقعدي معاه هتفهمي قصدي.
_ مش عايزة افهم حاجه بابا انا هقعد معاه وهصلي وهسمع كلامكم انما جواز منه مش موافقه.
اتنهد وطبطب على أيدي وهو بيبصلي بحنيه قلبي اتهز لثواني وانا طالعة معاه عادي يا تاج كلها كام دقيقة والموضوع هيخلص.
_هو الصالون بعيد كده ليه
ضحك _ علشان متوترة بس.
_ انا لا خالص وهتوتر ليه يعني!
_ طيب اقعدي معاه واهدي ها بالراحه ع الراجل.
_ انت محسسني اني هعضه متقلقش يبابا أنا مسالمة والله.
دخلت معاه وانا عيوني بعيد مفهمتش ليه! ارفعي عينك خليكي قوية رفعت عيوني بقوة وبصيتله ماله مهو حلو اهو اومال مطلق ليه!
_ازيك يا آنسة تاج!
رديت بقرف _ كويسة.
_ احم انا اسمي عدي و..
_ مسألتكش.
_ أيوة بس مهو المفروض تعرفي يعني الحاجات دي عني وبعدين علشان لو وافقتي لو...
_ لو وافقت!
_ نعم!
_ولا حاجه اتفضل كمل.
مكنتش مركزة في كلامه لطيف وهادي لا مش ده اللي أنا عايزاه منك لله يوعد هو ده اللي كويس!
_ ده عيل توتو اظن عرفت مراته سابته ليه.
_ هو شغال ايه
_ معرفش ومش عايزة أعرف.
_ انتي طلعتي بميكب.
_ طبعا انتي فاكرة اني هتغير علشانه.
_ يمكن.
بصيتلها وسكت طيبة اوي وعد وفاكرة اني ممكن اتغير علشان حد أنا لو مقتنعتش مش هتغير مش فاهمة بصراحه الناس بتتجوز ليه لما ممكن تتطلق بتثق في حد كده لدرجة انها تكمل معاه باقي حياتها تقوم من النوم علشان تحضرله فطار!
_طفحه.
_ اتهدي شوية اتهدي يعني الراجل ميفطرش!
_ يفطر ولا ميفطرش انا مالي!
_ تاج صليتي!
_ اه صليت بس محستش بحاجه اصلا مبفهمش في الإشارات لو الإشارة بترقصلي مش هشوفها.
ضحكت _ طيب هتعملي ايه!
_ فكك بقا.
من وقت ما سي عدي أتقدم والكل متغير انا مبوافقش على حد يتقدملي واحد متجوز! هو اكيد مسألش قبل ما يجي اكيد لو سأل مكنش جه.
_ المشكلة الحقيقية أن ابوكي وافق.
_الواد ده عمله عمل يبنتي دي امي طول اليوم كلام
عليه