لم يكن أخي بقلم إيمان شلبي

انا بحس انس اخويا في الحقيقه انا وانس روح واحده هو اخويا وابويا وكل ما ليا عمري ما فكرت فيه كزوج !
نسمه وهي بتحاوط وشها بابتسامه خفيفه
اعتقد انك لازم تغيري فكرتك
بعدت عنها وهي مبرقه بذهول
يعني ايه اغير فكرتي !
يعني انس بيحبك بس مش عشان بيعتبرك أخته هو بيحبك ونفسه يكمل معاكي حياته
قفلت عينيها نص قفله بشك واستغراب
وانتي عرفتي كل ده منين هو قالك حاجه !
ابتسمت المره دي بغموض
هو مش محتاج يقول لان نظراته ڤضحاه من زمان
ردت بذهول
من زمان !!
اتنهدت وهي بتحط ايديها علي ايد ساره وبتطبطب عليها برقه
اعتقد انك محتاجه تقعدي مع نفسك وتفكري بقلبك شويه
قالت جملتها وقامت وسابتها وسط كم تساؤلات جت في بالها في الثانيه الواحده !
ضمت رجلها في بعض وسندت رأسها علي رجلها والابتسامه لا تلقائيا اترسمت علي وشها لما افتكرت اللي حصل من ساعتين بس بالتقريب
فلاش باك
بعدت عنه وقلبها دق بسرعه رهيبه وشها بقي لونه احمر اتوترت لابعد حد من كلمته
مع أن دي مش المره الاولي اللي تسمعها فيها!
هي سمعتها منه كتير جدا بس لاول مره تحس أنها خارجه من قلبه لقلبها مباشره لاول مره تحس انه طول السنين اللي فاتت دي مكانش بيحبها حب اخوي ده الموضوع اكبر من كده بكتييير
بلعت ريقها بصعوبه بالغه وقلبها بيترعش
ا انت قولت ايه
اتوتر ولف ظهره وهو بيفرك أيده
ق قولت ايه
قربت منه بخطوات بطيئه وهي بتحاول تاخد نفسها وحطت ايديها علي كتفه
انس انت بتحبني!
اخد نفس عميق وبلع ريقه ولف ليها مره تانيه وهو بيبتسم ابتسامه مهزوزه
مش احنا اخوات !
متأكد!
رفع حاجبه بمراوغه
عندك شك !
هزت راسها بتوتر
ل لا ا احم ا المهم انك مش زعلان مني
قرب منها وحاوط وشها بين ايديه وهو بيبص في عيونها
بنظرات اول مره تشوفها أو لاول مره تكتشفها !!
انا عمري ما ازعل منك
ابتسمت بتوتر وبعدت نفسها عنه وهي بتحاول تخفي توترها في الهزار
حبيبي حبيبي حبيبي لو هشحت كده محبش قدك
ضحك علي رد فعلها وهي خرجت من الاوضه وقلبها رافض يبطل يدق وكأنه بيعلن وبكل صراحه أنه عاشق لشخص ولا علي البال !
باك
الصبح الساعه ١٠
فتحت عيونها علي صوت المنبه بعد سهرتها لبعد الفجر وهي بتفكر في موضوع لاول مره يشغل تفكيرها
قامت فتحت البلكونه كان صوت الهواء بيخبط في الازاز السماء مغيمه علي وشك تمطر
ابتسمت لا تلقائيا علي منظر الجو المحبب لقلبها
صباح الخير
لفت وشها كان واقف في البلكونه وماسك فنجان قهوه في أيده وروايه كانت عطتهاله يقرا فيها مع أنه مش بيحب القرايه ابدا بس وافق وبدون اي مناقشات يشاركها اهتمامتها!
سندت ايديها علي السور وابتسمت برقه
صباح النور
بص للسما وابتسم بمرح
الجو حلو اوي
اوي بحبه جدا بجد
وقت مناسب للحب تماما
لفت رأسها ورفعت حاجبها باستغراب
الحب
هز رأسه بتأكيد
مش انتي دائما بتقولي أن شهر نوفمبر شهر مناسب للحب
هزت راسها بابتسامه
حصل
وانا
باكد علي كلامك هو فعلا وقت مناسب للحب
اممممم ماشي ياعم الرومانسي هنفرح بيك أمتي يعني !
ابتسم ابتسامه حزينه وبص قدامه
لما اللي بحبها تحس
قفلت عينيها نص قفله باستغراب
انت فعلا بتحب حد !
بصلها ورد بجديه
ومحبش ليه هو انا مش بني آدم
لا مش قصدي ا انا قصدي انك عمرك ما حكتلي حاجه زي كده هو احنا مش اخوات !
بصلها بغموض واتنهد بحزن
ادخلي جوا عشان متبرديش ياساره
انس انت لسه زعلان مني
لا مش زعلان منك
اومال في أي ليه حساك متغير من امبارح حساك شخص تاني غير اللي انا متعوده عليه !
ابتسم بسخرية
يمكن لانك متعرفنيش كويس
ردت باستغراب
يعني ايه !
بص في عيونها بقوه