وصية صفية الجزء الاول بقلم الكاتبة منال أم ابراهيم مرجان

لبنى أولا إلى منزلها قبل أن تعود إلى المنزل وما إن وصلا إلى منزل لبنى حتى أوقفت نورا السيارة قائلة
ادينا وصلنا يا ستي ابقي سلميلي بقى على خالتو سمية ولميا لما تطلعي
التفتت إليها لبنى قائلة
ما تطلعي معايا وتسلمي عليهم بنفسك وبالمرة نتغدى سوا
اعتذرت نورا قائلة
لا معلش يا لبنى مش حينفع خليها يوم تاني عايزة اروح ارتاح شوية وبعدين ابتدي في الأبحاث المطلوبة مننا
يا ستي لو مش عايزة تطلعي عشان خاطر علي اطمني علي مش بييجي من الشركة دلوقتي اطلعي معايا بقى وما تبقيش غلسه وبعد الغدا نقعد سوا نعمل الأبحاث المطلوبة مننا
استجابت نورا لطلبها قائلة بإذعان
أمري لله أنا عارفة إني مش حاخلص من الزن بتاعك ده
بعد دقائق كانت نورا تقف أمام باب شقة عمها بصحبة لبنى التي وضعت المفتاح في الباب وادارته ثم دلفت منه وأشارت إلى نورا أن تتبعها كانت سمية تقف في المطبخ وهي تقوم بإعداد طعام الغداء بينما وقفت لمياء إلى جوارها تساعدها عندما دخلت لبنى وهي تصيح قائلة بمرح
يا أهل المنزل الكرام أنا وصلت بالسلامة ومعايا ضيف ليكوا عايز يسلم عليكوا ياريت تخلصوا بسرعة اللي في إيديكوا
استدارت سمية لتجد نورا واقفة إلى جوار لبني فابتسمت قائلة بترحاب
نورا ازيك يا حبيبتي أخبارك إيه?
بادلتها نورا الإبتسامة وهي ټحتضنها قائلة
الحمد لله يا حبيبتي أنا كويسة انتي اللي عاملة إيه
ربتت سمية على ظهرها قائلة بحنان
بخير يا حبيبتي طول ما انتي بخير
اقتربت منها لمياء قائلة
احم احم نحن هنا
احتضنتها نورا قائلة بإبتسامة
ازيك يا لميا أخبارك إيه وأخبار الكلية معاكي إيه?
الحمد لله ماشي الحال
تدخلت لبنى في الحوار قائلةوهي تنظر إلى والدتها
أنا اقنعت نورا انها تطلع تتغدى معانا يلا بقى يا ست ماما مش عايزين نجوعها معانا احسن تقول إني ضحكت عليها ولا حاجة
بس كده حالا يا حبيبتي ويكون الغدا جاهز يلا يا بنات حضروا السفرة
نورا إيه ده هو انتوا مش بتستنوا علي لما يرجع من الشركة?
سمية لا يا حبيبتي اصل علي النهاردة مش في الشركة
سألتها لبنى وهي تقوم بوضع الأطباق على المائدة
أمال راح فين يا ماما
سافر دمياط بيقول عمك مكلفه بشغل هناك راح عشان يخلصه
سألتها لبنى قائلة في إندهاش
الله امال احمد وادهم بيعملوا إيه ?
أنا عارفة بقى هو اللي قالي كده الصبح وهو بيحضر شنطته
لبنى خلاص يا نورا بما إن علي مش هنا النهاردة يبقى تباتي معانا ونسهر سوا نعمل الأبحاث والصبح نروح الكلية مع بعض قولتي إيه?
صمتت نورا للحظات وهي تفكر ثم قالت بخفوت
معلش يا لبنى مش حينفع يمكن بابا مايوافقش
اندفعت سمية تجيبها كبركان خامد اشتعلت حممه فجأة
مايوافقش ليه بقى هو صفوت حيمنعك عني هو مش ده بيت خالتك برضه ولا هوعايز يحرمني منك?
اسرعت نورا تجيبها وهي تنفي هذه الإتهامات عن والدها
ابدا والله يا خالتو هو عمره ما منعني إني اجيلك والله ده دايما بيجيب سيرتك بكل خير وبيقول انك أصيلة ووقفتي مع عمو عزت الله يرحمه في عز أزمته
تعجبت لبنى من نبرة والدتها الحادة دون مبرر فسألتها قائلة
مالك يا ماما يا حبيبتي هيا نورا قالت إيه يعني لكل ده ?
اجابت لمياء بدلا عنها قائلة
اصل علي حكى لماما الصبح على الموقف اللي عمي صفوت عمله مع نورا النهاردة ومن ساعتها وماما مشحونة زي ما انتوا شايفين
أجابت نورا بصوت يحمل الكثير من الحزن والأسى
ماتزعليش نفسك يا خالتو أنا خلاص اتعودت منه على كده بس أنا مش قادرة افهم سر المعاملة اللي بيعاملهالي دي أنا بشوفه مع نادية بيعمل إيه بستغرب اوي بحس إنه واحد تاني خالص أنا مافيش إختلاف بيني وبين نادية غير في إسم الأم بس وأنا ما اعتقدش ان ماما الله يرحمها كانت ست وحشة عشان بابا يكرهها كده ومش ذنبي إني طلعت شبهها وإنه كل ما يشوفني يفتكرها تعرفي يا خالتو أنا لو ماكنتش عارفة أمي كويس كانت دماغي راحت لحاجة وحشة لكن أنا واثقة في أمي وف أخلاقها يبقى ليه كرهه ليها ده إيه ذنبها إنه ماقدرش يقول لجدي لأ ويصمم عليها ولا فيه حاجة تانية غير كده أنا ما اعرفهاش
سمية وقد بدا عليها التأثر
اوعي اسمعك تقولي كده مرة تانية يا نورا أمك كانت أشرف ست في الدنيا وأبوكي نفسه لو كان شاف عليها حاجة ماكانش خلاها على ذمته لحد ما ماټت الله يرحمها
طيب قوليلي هو ليه كان بيحب طنط فردوس الله يرحمها ومابيحبش ماما?
سبحان الله يا بنتي الحب والكره ده حاجة بإيد ربنا سبحانه وتعالى وحده ومش معنى ان أبوكي كان بيحب فردوس اكتر ان أمك كانت ست وحشة لا سمح الله
لم تتحمل لبنى الجوع اكثر من ذلك فقالت بمرح
إيه يا جماعة انتو حتقعدوا تتكلموا وتسيبوا الأكل يبرد ناكل الأول وبعدين اتكلموا براحتكوا
مسحت سمية عيونها التي ترقرقت بالدموع وقالت بجدية
ايوه صحيح الكلام خدنا ونسينا الأكل يلا يا حبيبتي عشان ناكل
نورا أنا حآكل بس على شرط
لبنى كمان حتتشرطي علينا مش كفاية تفضلنا عليكي وعزمناكي على الغدا
التفتت سمية إلى لبنى الجالسة أمام المائدة قائلة
ده اسمه كلام برضه يا لبنى نورا تتشرط زي ما هيا عايزة عايزة إيه يا حبيبتي?
عايزاكي بعد الغدا تحكيلي عن ظروف جواز بابا وماما و بابا اتجوز طنط فردوس ازاي رغم معارضة جدي وليه جدي اصلا كان رافض بصي بإختصار كده عايزة اعرف كل حاجة عن الماضي
حاضر يا حبيبتي ناكل الأول وبعدين حاحكيلك كل اللي عايزة تعرفيه
الفصل الثالث
انتهى الجميع من تناول طعامهم وجلسوا معا يحتسون الشاي ويتحدثون كانت نورا أول من ابتدأت بالحديث قائلة ادينا آهوه يا ستي خلصنا أكل ممكن بقى تحكيلي اللي أنا عايزه اعرفه
عايزة تعرفي إيه بالظبط يا حبيبتي
وهو أنا اعرف إيه اصلا أنا كل اللي اعرفه ان بابا كان بيحب طنط فردوس الله يرحمها وجدي رفض جوازهم وڠصب عليه يتجوز ماما عايزة افهم بقى ازاي بابا اتجوزها ليه جدي كان رافض وليه نادية پتكره جدي حامد الله يرحمه اوي كده ولما تيجي سيرته بتتنرفز وتتعصب بصي من الأخر كده احكيلي كل اللي تعرفيه
وضعت سمية يدها على خدها واغمضت عينيها وشردت وهي تتذكر احداث الماضي الذي بدا أمامها وكأنه شريط سينمائي يعاد عرضه تنهدت بشدة وهي تسترجع أحداث ذلك اليوم وقالت بتأثر
أنا حاحكيلك من اليوم اللي عمك عزت دخل عليا البيت فيه وهو شايل نادية اختك على إيده وكانت وقتها عندها تلت سنين وده كان أول يوم اشوفها أنا وعزت واول مرة ابوكي هو كمان يشوفها وهو نفسه اليوم اللي ماټت فيه فردوس الله يرحمها
فلاش باك
نظرت سمية إلى الطفلة التي يحملها عزت بإندهاش وقالت مستفسرة
بنت مين الأمورة دي يا عزت ?
جلس عزت إلى جوار سمية وأجلس نادية بجانبه وهو يضمها إليه محاولا بث الطمأنينة في نفسها والټفت إلى سمية قائلا بتردد كمن هربت منه الكلمات
دي دي تبقى تبقى بنت أخويا
حدقت فيه سمية لفترة غير مستوعبة لما قاله قبل أن تقول
أخوك مين انت عندك إخوات غير صفوت?
ماهي دي تبقى بنت صفوت
بنت صفوت! طب ازاي? خلفها امتى ده ومن مين? دي واضح كده انها اكبر من نورا
دي حكاية طويلة اوي يا سمية حكاية بقالها اكتر من اربع سنين
طيب ما تحكيلي انا عايزة اسمع
فاكرة عم صبحي اللي كان بيشتغل شيال عندنا في المعرض أيام أبويا الله يرحمه
أيوه فاكراه مش ده اللي كان بيجيب لنا طلبات البيت
ايوه هو صفوت أخويا كان متجوز بنته وخلف منها نادية
أخوك كان متجوز بنت صبحي وانت كنت عارف يا عزت?
وكنت شاهد على عقد الجواز كمان أنا وسعيد صاحب صفوت
كده برضه يا عزت تبقى عارف ان أخوك متجوز على أختي وتسكت وتداري عليه لأ وكمان تشهد على جوازه
يعني كنتي عايزاني اتخلى عن أخويا يا سمية وأنا عارف هو بيحب فردوس اد إيه ثم ان صفوت ماتجوزش على أختك صفوت متجوز فردوس قبل ما يتجوز صفية انتي مش لسه قايلة بنفسك ان نادية شكلها اكبر من نورا
طيب ولما هو كان متجوز إيه اللي خلاه يتجوز أختي وهيا فين مراته دي
مراته ماټت النهاردة النهاردة بس عرف مكانها بعد غياب اكتر من تلت سنين
لا حول ولا قوة الا بالله يعني البنت دي يتيمة دلوقتي يا عزت
ايوه يا سمية
طيب فهمني اخوك اتجوزها امتى وليه كان مخبي موضوع جوازه ده قبل كده ?
انا حافهمك كل حاجة يا سمية قبل صفوت اخويا ما يخطب صفية بأيام لما أبويا فاتحه في الموضوع صفوت رفض عشان كان بيحب فردوس ولما صفوت قال كده لأبويا أبويا هو كمان رفض عشان صبحي بيشتغل عندنا وده اللي صفوت كان متوقعه واللي أنا كمان قولتهوله لما فاتحني في الموضوع أبويا صمم بعدها يخطب صفية لصفوت ڠصب عنه وفي نفس اليوم طرد عم صبحي من المعرض واداله مهلة يوم واحد عشان ياخد بنته ويسيب البلد كلها صفوت طبعا كان عامل حسابه لو ابويا رفض أجر شقة بعيد عن البلد وراح لعم صبحي في بيته بعد أبويا ما طرده وطلب منه إيد فردوس وقاله انه حياخدهم على الشقة الجديدة اللي اجرها عشانهم عم صبحي وافق وراح معاه هو وفردوس وتاني يوم رحت معاه أنا وسعيد وكان معانا المأذون اللي كتب كتاب صفوت وفردوس أنا وسعيد كنا الشهود وبعدها بكام يوم صفوت خطب صفية وكتبوا كتابهم
وبعدين يا عزت إيه اللي حصل
صفوت قعد مع فردوس تلت شهور وبعدها عم صبحي ماټ وتاني يوم ۏفاته أبويا عرف بموضوع الجواز ده من عامل عندنا
في المعرض كان صاحب عم صبحي وهو الوحيد اللي عم صبحي اداله عنوانه الجديد ولما راح عشان يحضر العزا شاف صفوت أخويا وهو واقف ياخد العزا وسأل الجيران وعرف انه يبقى جوز بنته جري بعدها على أبويا وبلغه
وعمي الله يرحمه عمل إيه لما عرف?
للأسف كدب عليهم هما الاتنين وفرقهم عن بعض
كدب عليهم!
ايوه يا سمية أبويا تاني يوم راح العنوان اللي اداهوله العامل ده وكدب على فردوس وقالها ان صفوت هو اللي باعته وإنه وافق يطلقها بعد ما هدده إنه يتبرى منه ويحرمه من الميراث والمسكينة صدقته لأن اليوم اللي قبله يوم ۏفاة أبوها صفوت قالها إنه حيصارح ابويا بموضوع جوازهم عشان مابقاش ينفع انها تعيش بعيد لوحدها وعشان يجيبها تعيش معانا هنا في بيت العيلة فهمت ان صفوت كلمه واداله العنوان كمان بعدها ابويا طلب منها تلم هدومها وتمشي وقالها إنه مش عايز يشوف وشها في دمياط كلها وهيا