ابن ليل الجزء السادس لأميرة أسامة
المحتويات
عامله انا ذات نفسي مستغربه الادب اللي نازل عليا ده
ضحكوا كلهم علي سونه
سونه بضحك اه والنبي حاسه كده اني ملزقه وشغل النحنحه ده مش لايق عليا بس هو اللي طالع لوحده
دره يابت مره من نفسك يعني بزمتك ينفع الشكل والجسم يبقي لست والفعل دكر
مها احيه مين دي اللي دكر يابت دي كلها انوثه
سونه يا اختي نشالله تنستري اول مره تقولي في حقي كلمه عدله
سونه انتي تاني بنقولكم ايه روحوا اقعدوا في حته مش ناقصه توتر وبعدين لما عمرو يجي إن شالله تنستروا بلاش المسرح قدامه مش هنعرف نرد وبعدين لو رديت الراجل هيطفش
دره احنا نعمل كده لا طبعا
سونه تصدقي بالله مش خاېفه غير منك انتي واللي تنشك مها
مها بضحك يابت ده انا ما صدقت تيجي تحت ايدي
سونه حبيبتي يا دعاء انتي العاقله اللي فيهم
الباب خبط في الوقت ده اول ما رن الجرس سونه اتوترت ومسكت في ايد دعاء
دعاء في ايه يابت لاااا ده انتي حالتك صعبه وحقهم يطلعوكي مسرح
دره اهدي وروحي اقعدي يا مصېبه
سونه شكلي حلو طيب
مها يابت وربنا قمر الله يكون في عونك يا عمرو
دره بضحك بطلي قلة ادب هي ناقصه لغبطه
فتح عبدالله الباب واستقبله كرم اول ما مريم شافت سونه من بعيد جريت عليها ياسين فضل جنب عمرو كان مكسوف
سلم عمرو علي كرم وعبدالله ودخل سلم علي الكل رحبوا بيه وقعد بعد ما سلم علي سونه اللي بصتله ثواني وبسرعه بعدت عينها
نبيله نورت يا دكتور
عمرو الله يخليكي يا ست نبيله البيت منور بأصحابه
عمرو لا بقينا احسن كتير الحمد لله
عبدالله عملت ايه في الامتحانات يا بطل
ياسين الحمد لله كانت سهله
عبدالله الحمد لله يا حبيبي بالنجاح إن شاء الله
زكريا والقمر الصغير اللي دخل جري علي سونه ومسلمش علينا
كرم خلاص بقي لقت صحبتها
عمرو مسلمتيش علي جدو يا مريم
عمرو طيب يلا مش نسلم كده ونعرفهم ان احنا بقينا كبار وبنسلم
راحت مريم قربت من زكريا بحب
زكريا عامله ايه طمنيني عليكي
مريم الحمد لله كويسه
نجوي ايه اللبس الحلو ده يا مريم
مريم بابا اللي اختاره
نجوي جميل وانتي اللي محلياه
مريم شكرا
سابتهم مريم وجريت تاني علي سونه
زكريا بضحك الله كده بردو
عمرو بابتسامه جميله بص لسونه وبعدين بص لعبدالله ايوه صح هما صحاب نطلع احنا منها بقي
سماح طب وانا يا مريومه مش هتيجي تقعدي جنبي
مريم انا خاېفه علي ايدك
سماح بضحك ده حملة فكرهم ونكد عليهم دي خلاص يا ستي قربنا نفكها
مريم خلاص لما تفكيها
هبقي اقعد جنبك
سماح انتي پتخافي ولا ايه
مريم لا اخاڤ اخبطك فيها
سماح ياروووحي والله فكرتك خاېفه مني
هيما بهمس قرب من دارين
هيما ايه القمر ده
دارين انت اللي شكلك حلو اوي
هيما بجد
دارين اه والله وعلي فكره وحشتني
هيما يا نصابه ده انا مزهقك في عيشتك
دارين لا والله ابدا وبعدين انا مبسوطه انت مالك
هيما خلاص يا ستي هنطلع منها بنقولك ايه
دارين قول
هيما دره محستش بأي حاجه
دارين لا متقلقش بس لو دانه كانت طولت معاها شويه كانت حست
هيما بضحك دانه لا يبقي حست عملت ايه المصېبه دي
دانه كانت بتختار لمامي فستان تلبسه ومصممه عليه ومامي تقولها هو انا رايحه فرح ومرضيتش تلبسه
هيما مش مهم المهم انها محستش بحاجه انا كان قلبي حاسس ان المصېبه دي هتفضحنا
دارين كل ما افتكر كيرو وهو بيأكد عليها هي بالذات افطس من الضحك
هيما بضحك وانا والله اوعي يا دانه اوعي تقعي بلسانك هنعلقك
دارين والله لو كانت غلطت كان علقھا وصراحه كان هيبقي معاه حق
هيما بصي بس تحسيها كده قاعده مش علي بعضها عشان كاتمه السر
دارين بضحك اه اوي والله بس علي فكره دانه والله مش فتانه هي مشكلتها انها مش بتعرف تخبي تلقائيه وبتحب تتكلم بطبيعتها
هيما عارف والله هي مجنونه بس طيبه اوي
دارين طيبه خالص والله
هيما بضحك ديما بقي قاعده علي الله حكايتها لازقه في كرم مش راضيه تسيبه
دارين بإبتسامه تأثر ديما بتحب كرم اوي هي كانت متعلقه ببابي اوي عشان كده الوقت بقت ماسكه في كرم علي طول بحسها بيبي في نفسها وكيوت واوقات كتير بضايق عشانها
هيما متقلقيش عليها ادام مع كرم هتبقي ديما مبسوطه
دارين يارب يا هيما
استمر الكلام والترحيب وفتح المواضيع اللي ملهاش اي لزوم لمدة ساعه زي اي بيت مصري بيحصل
فيه مناسبه سعيده الكلام اللي مش مترتب والمواضيع الغريبه لازم تتفتح
دره بصت لكرم وضحكت بهدوء وشاورتله بهمس بمعني اتكلم لانهم مش هيسكتوا
ضحك كرم وهز دماغه شمال ويمين وبعدين عدل نفسه
كرم احمممم طيب يا جماعه نسيبنا بقي من المواضيع الشيقه دي وندخل في المفيد ولا ايه يا دكتور
عمرو بإبتسامه أيه الخطفه دي
كرم لا ما هي لازم تيجي بخطفه كده وبعدين عندنا شويه كلام عايزين نقوله بردوا
نجوي بضحك الله ما براحه عالجدع يا ولا
ابتسمت سونه بإحراج وفضلت باصه للارض وهي بتلعب في شعر مريم بإرتباك
كرم انا جيت جنبه انا قولت نغير المواضيع وسيرة المستشفي والجو الحزين ده
عمرو بتنهيده طيب يا جماعه كرم معاه حق وخلينا ندخل في المفيد حاج زكريا حاج رفاعي اكيد انتوا عارفين انا هنا ليه انا هنا عشان نطلب منكم ايد سونه
والحقيقه هي كانت مصممه علي ده لانكم عيلتها وانا جاي لحد عندكم عشان نطلب ايدها منكم
زكريا تشرف وتنور يا دكتور واكيد مش هنلاقي احسن منك كفايه شهادة كرم فيك
عمرو تسلم يا حاج كرم ده اكتر من اخ وربنا يعلم
رفاعي لو علينا يا ابني فا زي ما قال المعلم زكريا مش هنلاقي احسن منك لبنتنا بس الاصول بتقول اننا نسمع رأي عروستنا ولا ايه يا سونه
سونه بهمس احيييييه عليا
دره ومها ودعاء فطسوا من الضحك وبدأ الكل يضحك عليهم بهمس
نبيله مالك يابت يا رخمه منك ليها بترخموا عليها ليه
مها احنا اتكلمنا يا بلبله
سماح خبت وشها وكانت فطسانه من الضحك معاهم
رفاعي سيبك منهم يا سونه وسمعيني ردك
سونه بإحراج كان نفسها الارض تتشق وتبلعها وتقتلهم موافقه
نبيله سمعونا زغروطه يا بت انتي وهي
الكل فضل يزغرط وسونه بصالهم وهي مبتسمه ومحرجه سماح ضمتها من كتفها وهي مبسوطه
طبطبت سونه علي ايدها وفضلت ساكته مش عارفه تنطق
عمرو طيب انا في حاجه حابب اقولها لو تسمحولي
سكتهم زكريا وبص لعمرو
زكريا قول كل اللي في نفسك يا ابني
عمرو طبعا مش هقولكم متقلقوش علي سونه وانها هتبقي في عيني واني هعاملها معاملة الإسلام وكل الكلام ده لان بيتهيألي الفعل مع الوقت هيثبت كلامي وسعادتها قدامكم هي اللي هتثبتلكم اني بتقي ربنا فيها
وبردوا مش هنقول لسونه قدامكم اني عايزها اهم حاجه تعامل ولادي بطريقه كويسه ولا تعبترهم ولادها لان لو انا من البدايه مش واثق في النقطه دي مكانش زماني موجود هنا بالعكس سونه من قبل اي حاجه حبت ولادي واعتبرتهم زي سماح فا مش محتاج اوصيها عليهم انا واثق فيها
رفاعي كلام جميل ومبشر
عمرو انا بس ليا طلب لسونه حابب نطلبه منها قدامكم
زكريا قول كل اللي في نفسك يا ابني
عمرو انا عرفت من سونه انها تحت اي ظرف مش بتسيب بيتها عشان خاطر تكون حاسه بآمان
هي وسماح طبعا حقها ومفيش حد فينا بيرتاح غير في بيته
رفاعي اكيد طبعا يا ابني
عمرو بس كمان انا ليا طلب انا حابب ابدأ بدايه جديده في حياتي كلها مع سونه ومش حابب اننا نتجوز في البيت بتاعها مش عشان اي حاجه بس هتكون تقيله عليا كراجل اني اعيش في بيت مش بيتي البيت ده بيت سماح بيت والدها واللي مش من حق اي راجل يشاركها فيه وده حقها
وطبعا انا عارف ان سونه مرتبطه ارتباط قوي بالمكان هنا فا عشان كده انا قررت نبيع شقتي وناخد شقه قريبه من المكان هنا منها سونه تكون في وسطكم ومنها محدش يتعدي علي خصوصيه سماح في بيت والدها
وكلامي ده مش معناه ان سماح مش هتبقي معانا لا سماح هتفضل معانا زيها زي مريم وياسين
انا وسونه هنكون ضيوف عليهم
والشقه الجديده هتبقي بتاعتهم هما التلاته مش بتاعتنا احنا
زكريا بإبتسامه صراحه عداك العيب يا ابني
رفاعي ولو عالشقه في بدل الواحده تلاته في المنطقه هنا
عمرو مش هتفرق سونه وسماح والولاد يختاروا الشقه اللي تعجبهم لان هما اللي هيقعدوا فيها علي طول انا هنكون مجرد ضيف عليهم
نبيله ايوه يا ابني اللي بتقوله ده صراحه كلام زي الفل بس سونه هتقفل شقتها بس هتفضل موجوده انت هتقدر تبيع الشقه بتاعتك اللي ليك ذكريات فيها انا بنتكلم بس عشانك وعشان ولادك ميضايقوش
عمرو بصي يا ست نبيله اولا الشقه بتاعتي مش بعيده عن المكان هنا كرم هو اللي عارف مكانها يعني بينا حوالي تلت ساعه فا لو علي ارتباطي بالمكان انا والولاد مش هيفرق كتير اما بقي بالنسبه للشقه انا ذكرياتي الحقيقيه موجوده في شقه ابويا وامي الله يرحمهم ودي مقفوله وموجوده زي ما هي في سيدي بشړ امي جات قعدت معايا بعد ۏفاة مراتي الله يرحمها عشان تاخد بالها من الولاد والشقه دي كانت تاني مره نغيرها من بعد جوازي اول جوازي كنت قاعد
في شقه كذا سنه بس سيبتها لانها كانت بعيده عن الشغل وخدت الشقه اللي انا فيها دي قبل ما مراتي تتوفي بحوالي سنتين
يعني بإختصار الشقه دي اني اسيبها افضل ليا لاني معنديش فيها ذكريات حلوه فا مش هتفرق
وانا زي ما قولت حابب أبدا مع سونه والولاد كل حاجه تكون جديده هبيع الشقه بالعفش وكل حاجه وسونه تختار الشقه المناسبه وتنزل تختار العفش اللي يعجبها هي و الولاد واظن ان كده افضل ليا وليها وللولاد هنعمل فيها ذكريات جديده وخاصه بينا لا هي تكون مضايقه ان الشقه دي كان فيها ست غيرها ولا انا احس اني مضايق ان الشقه كان فيها راجل غيري وكمان عشان محافظ علي خصوصيه سماح في شقه والدها
بكر بإبتسامه صراحه يا دكتور عمرو مفيش كلام بعد كلامك
رفاعي عداك العيب بجد يا ابني انا عن نفسي شايف ان كلامك عين العقل وبيثبت انك حابب العلاقه تبدأ بطريقه حلوه
عمرو المهم الوقت رأي سونه وسماح كمان
سونه بإرتباك بصت لسماح
ابتسمت سماح ليها وهزت راسها بهدوء بمعني وافقي
سونه انا يعني معنديش اعتراض لو ده هيكون مناسب لينا كلنا فا اكيد انا موافقه خصوصا يعني اني هنفضل هنا في منطقتي وجنب الناس اللي في مقام اهلي
زكريا يبقي علي خيرة
متابعة القراءة
