دماء بريئة على الطريق لولاء حامد

يا عزت المقشفه دي جايلها دهب قد إيه
عزت برفعه حاجب_ مين دي اللي مقشفه يا ليلي ربك والحق سمر زي لهطه القشطه الصابحه البت جمال وأدب وأخلاق
ليلي بكره_ ولو بس بردوا عليت ولا وطيت كانت خدامه ليا ولسلايفي
عزت بإستغراب_ داه بيت ابوها وأمها كانت بتعلمها شغل البيت داه يا بخته يا هناه الواد جمال خد بت بداره أدب وأخلاق وجمال ومال وكمان لسه بداره ودماغها توزن بلد

ليلي بتعوجه بوق_ على إيه يا حسره
جمال_ على كل مميزاتها ومتنسيش جوز خالتك عنده اكتر من 15 فدان أرض غير قارتين بهايم فهمتي يا ام العوريف
ليلي الكلام مجاش على هواها وقفت وسكتت
طلعت ام العريس لحد كوشه العريس والعروسة وجمبها نعيمه
محروسه زغرده بصوت عالي والدي جي شغل اغنيه يا دبله الخطوبه
محروسه بفرحه_ لبس عروستك الشبكه يا ولدي
مد جمال ايده وبداء يلبس العروسه الشبكه المهوله اللي اشتروها وسط حلقه النميمه من الحريم والرجاله اللي حاضره
وبعد دقايق طويله كان خلص تلبيس كل الدهب واشتغلت الاغاني مره تانيه
مر الوقت وانفض الفرح ودخل جمال وسمر اوضه الجلوس يتعشوا
مسعود_ ادخل يا ولدي كل مع عروستك لقمه عشان يبقى عيش وملح
جمال بفرحه مقدرش يسيطر عليها_ تشكر يا حاج
قبل ما يدخل مسكه حسن من دراعه وبص في عنيه بقوه_ اللي جوه لحد دلوقتي في بيت ابوها يعني حدودك كخطيب مش زوج تمام يا عريس
جمال وفرحته انطفت من عنيه_ طبعا يا حسن من غير ما تقول انا راجل وبقدر بيوت الرجاله بس انتا نسيت اني كاتب كتابي
حسن_ عارف بس لسه في بيت ابوها وسط رجالتها لما تروح بيتك تبقى خرجت من كنف ابوها وإخواتها لكنفك وطلعت من اسم ابوها لاسمك
جمال_ طبعا طبعا
دخلت نعيمه صنيه العشا اللي عليها ما لذ وطاب من خيرات ربنا _ اتفضل يا عريس متتكسفش داه بيتك ومطرحك
وطلعت ولسه هاتمد ايدها تقفل الباب قطعها صوتها ابنها
حسن بصوت عالي_ سيبي الباب مفتوح يا حاجه مترديهوش
نعيمه سابت الباب مفتوح زي ما هو وقعد حسن ومصطفي ومحمود وجلال جمب بعض على الكنبه اللي في وش الباب على طول
جمال جوه عينه على سمر شويه وعينه على الباب شويه
جمال لنفسه_ وبعدين بقى في الهم الازلي داه يعني مهعرفش اقعد معاها لحالنا شويه واقفين بره ومرصوصين جار بعض زي صف العساكر ايمته وتعدي الأيام عشان أدب صوابعي في عين اتخن تخين فيهم
وفعلا جمال مكملش ربع ساعه يادوب كل لقمتين وهو تحت النظر من أخواتها اللي محدش اتحرك من مكانه شبر
وفعلا طلع واستأذن
مسعود بإستغراب_ ما بدري يا بني دانتا ملحقتش تقعد مع عروستك لحالكم شويه وتتكلموا كلمتين على بعض
جمال هو عينه على أخواتها_ بدري من عمرك يا حاج الوقت اخر وكمان من بكره والأيام اللي جايه ورايا شغل كتير قبل الفرح وكمان تجهيز الدور كله لازمله شغل ياما
مسعود بإقتناع_ ربنا معاك يا ابني ويسهلك طريقك
جمال_ طيب استأذن انا السلام عليكم
الجميع في صوت واحد_ وعليكم السلام ورحمة الله وبركاته
طلعت سمر من سكات علشان تدخل تغير هدومها وتهرب لحالها زي كل يوم بس قبل ما تدخل
مسعود_ مبروك يا سمر
سمر بصتله بحزن_ طيب
مسعود_ ايه طيب دي اتعدلي يا بت كفايه اني سكتت على سرمحتك
سمر بدموع_ كتر خيرك يا حاج عن اذنك
وسابت الكل ساكت وكأن على روسهم طير خاېف يتحرك او يتكلم ليطير
دخلت سمر وقفلت الباب بهدوء وغيرت هدومها وحطت رأسها على السرير وبدئت رحله الدموع المحپوسه طول اليوم في عنيها