هل يرتاح الفؤاد يوما بقلم خلود الحناوي

1
انتي طالق يا تقي
ابتسامتي اللي كانت ماليه وشي وانا بفتكر ايامنا سوا تلاشت لما الجملة زلزلت كياني عدي شهرين علي الذكري دي وحقيقي تمضي الشهور ويبقي الشعور.. ازاي انسي اليوم واللي حصل فيه كان يوم عاصف زي ليالي الشتويه الباردة بس الفرق ان البرودة والعاصفة كانت في قلبي انا ومحدش اتأذي قدي انا
حسيت برجفة في جسمي لما زادت بروده الهوا سحبت الشوز من جمبي وانا بفارق الشط اللي اتعودت اجيله كل يوم احكيله همومي بعد مبقاليش حد غيره في الدنيا احكيله..
روحت البيت كنت داخله العمارة علشان اتفاجئ بيه قاعد مستنيني واضح انه مستني من بدري كان قاعد علي السلم.. سرحان.. شعره نازل علي عيونه حاجب سحرها عني دقنه نمت بشكل واضح شكله مبهدل ودي مش عادته
فوقت لنفسي وفوقت من صدمتي اني شوفته حاولت اتخطاه بس ايده مسمحتليش اعدي من جنبه بالساهل جسمه لسه ثابت علي وضعه متحركتش ليه شعرايه عكس ايده اللي شاده علي رسغي..بتملك
كفايه بقي يا تقي انا تعبت من البعد تعبت ومش قادر اكتر من كدا
رفع راسه بصلي وكمل
صدقيني مش قادر اعيش وانتي بعيدة عني كل حاجة في بعدك بقت مېته حتي انا من غيرك ولا حاجة صدقيني مت
مستحملتش اكتر من كدا من يوم فراقنا وانا مدمعتش حتي.. جايز اتعودت ان كلهم فترات حتي اقرب الناس ليا مهماش باقيين ليا حتي اللي جابوني علي الدنيا فارقوني واتخلوا عني!!
رديت عليه باڼهيار خلاص فاض بيا انا مش لعبه وقت ميعوزها يلاقيها ولما يزهق منها يرميها
كفاية إيه يا يونس كفاية إيه.. انت اللي كفاية كفاية تجريح فيا كفاية لعب بمشاعري كفايه ۏجع وكل شويه وعود كدابه تطلعني بيها سابع سما وتقوم مفوقني علي واقع يوقعني علي جدور رقبتي ويخسف بيا الارض ارحمني بقا.
فلت إيدي منه وجريت علي الشقه دموعي كانت نازلة شلالات علي خدودي مش عارفة اوقفها والباب مش راضي يفتح سمعت صوت جاي من الشقة اللي قصادنا مسحت دموعي بسرعه وانا بحاول اتمالك اعصابي هديت حاولت تاني افتح الباب..
تقي..
الټفت ورايا كان صوته اللي طول عمره بيطمني جايز دا الحد الوحيد اللي عمره مفكر حتي يخزلني
قرب مني لما لقاني سرحانه وسألني بالراحه وهو بيفرقع صوابعه قدام وشي..
مال وشك يا تقي انتي معيطة في حاجة حصلت انتي كويسة
رفعت وشي ليه وحاولت اكتم دموعي علي قد مقدر اخدت نفسي بالراحة وجاوبته
منا كويسه اهو يا زين وشي نفخ من البرد بس علشان بقالي كتير قاعده علي البحر عن إذن...
زين انت واقف عندك بتعمل ايه
بص وراه ورجع بصلي من تاني بتوتر كانت منه صاحبتي او اللي كانت صاحبتي كانت سانده علي باب شقته نظراتها اتغيرت لما شافتني توتر خوف مني شفقة.. معرفتش افسرها ملامحها مبقتش شفافه ليا زي زمان مبقتش منه اللي اعرفها مجرد انسان دخل حياتي وخرج منها زي اي حد ..عادي
مقدرتش استحمل كم الذكريات اللي هاجمتني استأذنت منه ودخلت الشقه قفلت الباب ورايا وانا بۏلع النور
يا ريت حياتي زي زرار النور دا مجرد ضغطة إيد تتمحي الضلمة اللي مخيمة عليها وتنور دنيتي تاني بس السؤال هنا انا امتي حياتي كانت منوره علشان ترجع تنور زي زمان
اتجهت لأوضتي الاوضه الوحيدة اللي مفتوحه في البيت عكس كل اوضه المقفله انا اللي قفلتها زي مقفلت صفحات اصحابها من حياتي وللأبد
رميت نفسي علي السرير عيطت اڼهارت مقدتش استحمل اكتر من كدا بقاله شهرين بعيد عني مدمعتش حتي وكإن ظهوره كان الاشارة الخضرا علشان افوق من صدمتي واستوعب انه مبقاش موجود خلاص زيهم
نمت زي منا من التعب صحيت علي صوت الباب بيخبط قمت مڤزوعة مين هيخبط في الوقت دا وقفت قدام الباب بړعب ياتري افتح ولا اعمل نفسي مېته الباب رجع يخبط إيه الاصرار دا فتحت فتحة صغيرة اشوف مين.
خير عايزة إيه
افتحي يا تقي الباب دا ربنا يهديكي
ايوا قولي عايزة ايه منا فاتحه اهو
دخليني يا تقي طيب انا تلجت من البرد انجزي
قولي عايزة اي من هنا انا مبدخلش حد غريب بيتي
فكرتها هتمشي بعد ما رميت كلامي السم في وشها بس اللي حصل انها بلعت صډمتها بسرعه زقت الباب بغباء ..المتخلفة زقتي انا معاه
فكرك هتصعبي عليا ويا عيني واقعد ادادي فيكي تبقي بتحلمي يا تقي بقالك كتير سايقة العوج وانا بقي هظبطك تعاليلي بقا يروح امك
رجعت لورا خطوتين وانا بزحف.. خفت ايوا خفت.. مهو انا عارفه الوش دا لما بيطلع ايه اللي بيحصل
حطت الحاجات اللي كانت في ايديها علي السفرة ورجعت وقفت قدامي مدت إيديها علشان تساعدني اقف
انجزي هتفضلي باصه لإيدي كدا كتير إيه جو الافلام الهندي الحمضان دا
انتي بتعامليني كدا ليه وإيه اللي رجعك اصلا مش كنتي بعدتي عني
ميلت عليا وبرقت وهي بتمد إيدها ليا بعصبيه وقالت من بين اسنانها
هاتي ايدك يا تقي وقومي ليلتنا لسه طويلة متخليهمش يطلعوا عليكي دلوقتي واصبري علي رزقك
مسكت ايدها شديتي وقومتني مسابتش ايدي وجهتني ناحيه السفرة وقعدتني فتحت الاكياس وطلعت منها اكل كانت جيباه معاها
بقالك شهرين شكلك مش عاجبني بتخرجي الباسكيت عندك كله دليڤري مبقتيش مهتمة بحاجة ولا حتي بقي همك نفسك كل اللي فالحة فيه انك تنامي وتروحي البحر وتاكلي سم من برا والاهم بتخرجي الناس من حياتك بمزاجك دانتي لو بتقتلي نفسك بالبطيء هتكوني حنينه عليها اكتر من كدا
اخدتي بالك بس اني مش كويسه من شهرين وبالنسبه للسنين اللي قبل كدا كانوا ايه كنت شفافه بالنسبالك ولما لقيتي ان الدنيا فضت عليا ومليش غيرك يعني جايه تتصعبي عليا وتشفق..
_ بس يا تقي اخرسي مش عايزة اسمع منك كلمه كمان لو حضرتك عندك قلب نتعاتب وقلبك جامد اوي كدا فيالا بينا نجيبها من قديم أوي من أيام الجامعة وزين هاا حابه نبدأ من هناك
انا قولتلك اني غلطانه واعتذرت عن اللي حصل وبعدين منتي وهو سمنة علي عسل اهو زعلانه ليه بقا
_ انتي يا بت عبيطه ولا بتستعبطي هو ايه اللي سمنه علي عسل دنا والواد بنخاف نتقابل في مكان قريب منك علشان بنخاف منك متخيله اتتين مكتوب كتابهم بتصرفوا كإنهم حراميه خايفين لحد يقفشهم دنتي مربيالنا الړعب اكتر من بابا ايام الخطوبه
ايوا وانتي عايزة تطلعيني الوحشه يعني ماشي يا ستي انا اللي ظلماكو وبطفي السجاير تحت باطكو ولو جايه تاخدي الامان انك تقابلي سي زين فنا معنديش مانع يا دكتورة منه اشبعي بيه انا مش معقدة نفسيا ولا هغير من صاحبتي علشان مبسوطه بجوازها من حب حياتها قولتلك اني وقتها مكنش ليا غيره وخفت لما ترتبطوا تخليه يبعد عني علشان كدا قولتله انك مش كويسه وزقيت ابراهيم عليكي علشان يبعدك عن طريقه وعرفتك اننا مرتبطين فهمتي بقا..
اتنفست بسرعه كنت حاسه اني بتخنق اكتر حاجة بترعبني الاټهامات مبعرفش ادافع عن نفسي ولا بعرف احل مشاكلي دايما بهرب