انت القرار السديد بقلم اسراء ابراهيم

انت القرار السديد بقلم اسراء ابراهيم
بعد الفرح بأسبوع نزلت حنين تحت لحماتها فقالت.. ازيك يا ماما
حماتها.. الحمد لله بعد كدا تنزلي بدري مش هنفضل مستنين جنابك للضهر
حنين باستغراب.. ضهر إيه الساعة لسه تسعة ويدوب روقت شقتي ونزلت يا حماتي
حماتها.. لأ بصي يا حبيبتي أنت هنا تعملي اللي أقولك عليه وماتجادليش العيشة اللي عيشتيها في بيت أبوك تختلف عننا كل بيت وله أسلوب حياة ماشي عليه واحنا لينا أسلوب ماشيين عليه وجنابك تتبعي قوانين البيت دا الساعة سبعة تنزلي عشان تجهزي الفطار لسلايفك عشان يلحقوا يروحوا شغلهم وبعدها تروقي الشقة هنا وتغسلي أي هدوم ولا مواعين ومش هتطلعي شقتك غير بعد لما نتعشى وتغسلي المواعين وتروقي البيت فاهمه

حنين بضيق.. فاهمه يا حماتي
حماتها.. أهو كدا تبقي شاطره وتكسبيني كلمتي هي اللي ماشية في البيت هنا على فكرة والشورة شورتي يعني لو نملة دخلت ولا خرجت ببقى عارفه لو أمك جاتلك ومعها حاجة تسيبها هنا ومافيش أكل تاخديه معك شقتك غير عيش وجبنة وحبايتين طماطم عشان لو جوزك حب ياكل بعدين ومبنطبخش اللحمة غير مرة في الشهر أنت شايفة الحاجة غليت وكمان لسه بنسدد الديون اللي علينا بتاعت الفرح
حنين پصدمة.. اومال هنقضي باقي الشهر إيه يا حماتي ولا هنطبخ الطبيخ من غير لحمة ولا شوربة إزاي
حماتها.. زمان الناس كانت عايشة كدا وكانت صحتهم كويسة يعني مش هيجرالك حاجة لو ماكلتيش لحمة غير مرة واحدة في الشهر ياختي ولا هو إسراف وخلاص وبعدين ما هنعوضه بالسمك كل أسبوع هنجيب كيلو سمك
حنين پصدمة.. كيلو بس دا احنا دلوقتي بقينا ست أشخاص في البيت هيكفونا إزاي
حماتها بعوجة بوق.. أنت هتجادليني يا بت ما أهو أنت مش هامك حاجة الفلوس مش بتتعبي فيها ولا قلقانة من حاجة هنقسم السمك يا اختي زي اللحمة نوايب يعني واللي يخلص نايبه يكمل رز وسلطة ولا عيش وسلطة في ناس بتاكل العيش حاف احمدي ربنا إنك بتلاقي أكل زي دا وباقي الشهر هنطبخ عدس ولا ملوخية ونسلك يا اختي والفلوس بتبقى معايا أنا جوزك وأخواته مرتبهم في إيدي وبياخدوا فلوس مني على قد المواصلات بس
كانت حنين بتبصلها پصدمة معقولة هتعيش العيشة دي وتستحملها مكنتش تعرف إن دا أسلوب حياتهم لما كانوا بيجولنا ومعهم حاجات ماكنش يبان عليهم إنهم بخلاء كدا وكان ابنها بيجبلي هدايا اومال كان بيجيب الفلوس دي منين دا أنا وقعت مع ناس بخيلة جدا ولا كان أيام الخطوبة بيذوقوا في الكلام والحاجات عشان يصطادوني أهو يا لؤمة
حماتها.. قومي يلا يا حنين اغسلي المواعين وجهزي الغدا وأنا يا ستي هروق الصالة عشان بس لسه عروسة مش هخلي الشغل كله عليك من دلوقتي
حنين في سرها.. لا جيتي على نفسك أوي مش عارفه أودي تواضعك وطيبتك دي فين 
وبصتلها وقالت ماشي يا حماتي تسلمي
وراحت تغسل المواعين وحطت صابون ومايه وبدأت بالكوبايات الأول دخلت حماتها عندها وقالت پصدمة.. إيه دا كل دا صابون بتغسلي بيه
وجريت عليها وخدت منها علبة الصابون وخدت نصها وحنين بتبصلها پصدمة هو كمان البخل وصل للصابون
حنين.. دول شوية صابون وعليهم مايه وبعدين المواعين كتير وكمان الصابون اللي حطيته مكنش هيكفي
حماتها بزعيق.. أنت هتخربي البيت ولا إيه مش عايزه يكون حيلتنا حاجة لأ بصي يا حبيبتي إن كنت بتعملي كدا عشان أقولك ماتعمليش حاجة وكدا فتبقي بتحلمي أصل قريبتي كانت مرات ابنها بتعمل كدا عشان تقعد لنفسها بس أنا غيرها يا حبيبتي
حنين بضيق.. يا ماما أنت مكبرة الموضوع ليه وبعدين أنا مش في نيتي حاجة ومفيش حد بيعمل اللي بتعمليه دا الحمد لله الخير كتير بس حضرتك بتقرطيها علينا
حماتها بعصبية.. تعالي يا بت اديلي قلمين أحسن
سكتت حنين عشان شايفة إن الكلام معها مش هيجيب فايدة وهينقلب عليها بالغلط فقررت تسكت ولما تطلع شقتها تبقي تكلم جوزها في الموضوع دا
حماتها.. أنا بلمع المواعين بشوية صابون صغيرة مش علبة صابون وطلعت من المطبخ
وكملت حنين بضيق وبعد فترة خلصت وبدأت تحضر الحاجة اللي هتعملها للغدا
كان جوزها نزل من شقته سلم على والدته ودخل لحنين المطبخ لقاها مضايقة
فقال أمين بابتسامة.. الجميل مضايق ليه
حنين.. بيتهيالك مش زعلانة ولا حاجة
أمين.. قولي بجد مالك أمي قالتلك حاجة